الرئيسية
السلام عليكــم ورحمـة الله وبركاته
1 -6
فِي أَحَدِ الأَيَامْ وَقَدْ اكْتَسَى اللَّيْلُ المَكَان ، وَفَرَضَ اللَّوْنَ الكُحْلِي عَلَى الأَجْوَاء
كَاَنْت مُنَى جَالِسَة عَلَى سَرِيرَهَا .. وَبِجَانِبهَا بَعْضُ الكُتُبْ ..
كَانَتْ مُنْهَمِكَة فِي حَلِّ ذَلِك الْوَاجِب المَدْرَسِي ...
فَقَدْ أَخَذَتْ مِنْهَا تِلْكَ الْمَسْأَلَة الْكَثِير مِنَ الْوَقْت لِحَلِّهَا ، وَهِيَا تَتَطَلَّعْ إِلَى السَّقْف
وَيَجُولُ بَالَهَا فِالتَّفْكِيرِِِ فِي حَلِّ هَذِهِ المَسْأَلَةِ الْمُعَقََّدَة
إِذْ سَمِعَتْ هَمَسَات قَاِدَمة مِنَ الْبَابِ لِتُخْرِجَهَا مِنْ تَفْكِيرَهَا
الأمْ . درتى عشى خوتك وبوك
مُنَى . اهو نايضة شوية بس خلي نكمل إلي في ايدي
الأمْ. باهي العشاء اذن خلي نمشي نصلى . و نوضي سلم بنيتي وما تنسي تغلي الحليب .
منى .. باهي شوية و نوض
خرجت الأمْ مِنْ عُتْبِة الْبَاب وَ قََََََََََََََََََََََدْ لَََََبِِِِِِِِِِِِِِِِِِِِسَت بَدْلَة الصَّلاَة ، واتَّجَهَت إِلَى غُرْفَتِهَا لِتُصَلِّي العِشَاء
فَلَم تَمْضِي سَاعَة عَلَى أَذَانِه . حَيْثُ كَانَت عَادَة الأْم أَدَاء كُلَّ فَرِيضَة فِي وَقْتِهَا
مَا إِنْ خَرَجَت الأمْ حَتَّى وَضَعَت مُنَى القَلَم بَيْنَ دَفْتَرِهَا ، وَتَغْلُقُه وَتَنْهَض مُتَثَاقِلَة مِن كَثْرَةِ الجُلُوس عَلَى الفِرَاش
لِتَتوَجَّه إِلَى غُرْفَة المَعِيشَة
كَانَ الأَب مُتَكِئ عَلَى تِلْكَ الوِسَادَة ، وَفِي يَدِه جِهَاز التَّحَكُم يُقَلِب القَنَوَات وَاحِدَة تِلْو الأُخْرَى
دَخَلَت عَلَيْه مُنى بِخَطوَات هَادِئَة . لِتَقُولَ بِصَوْت هَادِئ
مُنَى . بوي نديرلك عشاك
نَظَر الأب إِلَى ابْنَتِه بِنَظْرَه مَمْلُوءَة بِالحِنِّيَة .
الأب. كملتي قرايتك
مُنَى . إيه قريب نكمل شوية ونتم .. غير قلت ناخد راحة على الأقل
الأب . تعشو خوتك
مُنَى .. اهو توا منعشيهم .. شن نديرلك يا بوي
الأب . عشي خوتك قبل . أمك وين
مُنَى . خشت تصلي العشاء . تبيها نضبح عليها
الأب . عشي خوتك قبل . أنا جيبلي طاسه لبن والتمر إلي جبته أمس .. مازال فيه ولا ؟
مُنَى . إيه قاعد . ما تبي شئ تاني
الأب . أنا شن قتلك .. !!
مَا إِن سَمِعَت مُنَى الكَلِمَات الأخِيَرة حَتَّى هَزَّت رَأْسَهَا بِأَنَّها فَهِمَت مَطْلّب أََبِيهَا ....اتجَهَت عَلَى الفَوْر إِلَى المَطْبَخ
قَاَمَتْ بِوَضْع الحَلِيب عَلَى النَّار .
ثُمَّ جَهَّزَت صَحْن وَوَضَعَت بِهِ بَعْضَ حَبَّاتِ التَّمر وَاخْرَجَت اللَّبَن مِن الثَّلاَجَة لِتَسْكُب قَلِيلا فِي كُوب كَانَتْ قَدْ أَخْرَجَتْهُ
لِتَضَعهُ فِي صُفْرَة التَّقْدِيم . لِتتجِه فَوْرا إِلَى غُرْفَة المَعِيشَة وَتَضَعَهَا بِالقُرْب مِن أَبِيهَا ..
وَتَعُود إِلى المَطْبَخ لِتُغْلِق النَّار عَلَى الحَلِيب فَقَد اكْتَمَل الغَلَيَان
ذَهَبَت لِفَورِهَا إِلَى غُرْفَة إِخْوَتِهَا ...
لِتَقُول بِنَبْرَة جَافَّة
مُنَى . شن تبو تتعشو
نَظَرَ إِلَيْهَا أَحْمَد
احمد . .عندنا هريسة
مُنَى . إيه في . ما تقوليش تبي دحي . راهو عندي قراية هيا سقد روحك أنت وياه
احمد . باهي ديري نص تن . ما تكتريش الهريسة مش زى أمس .
مَا إِن سَكَت أَحْمَد حَتَّى تَكَلَّم عَبْدُ الله .
عَبْدُ الله . ما نبيش تن أنا .. ديريلي جبنة
مُنَى . شن نخدم عندكم .. ما فيش جبنة . توا نديرلكم تن . انتم الزوز .. نضبح عليكم . تعالو طول . ما خصني فيكم كان ما جيتوش
الإثْنَان فِي نَفْسِ الوَقْت . باهي وأنت تكشخي
خَرَجَت مُنَى وَلَمْ تَكْتَرِث لِكَلِمَاتِهِم فَقَد تَعَوَّدَت عَلَى تَصُرَّفَاتِهِم وَ كَلاَمِهِم ألاَذِع
دَخَلَت المَطْبَخ وَجهَزَت عَشَاء إِخْوَتِهَا بِسُرْعَة فَهُنَاك وَاجِب لَمْ يَكْتَمِل فِي انتِظَارِهَا
بَعْدَ أن قَامَت بِتَجْهِيز كُلِّ شَئ . نَادَت عَلَى إِخْوَتِها لِيَأْتَوا سِرَاعا
مَا إِن سَمِعُوا صَوْتَها وَهِي تُنَادِيهِم . أَتَو يَتَرَاكَضُون . مَنْ يَسْبِق الأَخَر . دَخَلُوا المَطْبَخ
وَ أَخَد كُل وَاحِد مِنْهُم كُرسِي عَلَى تِلْك الطَّاوِلَة المُسْتَطِيلَة .
أَحْمَد . ما فيش مشروب
مُنَى . ما فيش هيا كول بسرعة . اهو جنبك المية اشرب .
َ أَحْمَد . تم الفوستر . أمس كان فيه مصرع تم
مُنَى . تم اليوم . جت خالتك الظهرية هيا وبنتها .
عَبْدُ الله. امتى
مُنَى . لما كنت في المدرسة يا فالح . هيا سقد روحك
عَبْدُ الله. باهي .... علاش خبزتي شوية
منى . ما فيش خبزة . هدا ألي فاضل من الغدى
مَا إِن أَكْمَلَا عَشَائَهُم .. قَامَت بِتَنْظِيف مُخَلَّفَاتِهِم وَغَسل الأَوَانِي لِتَدخُل عَلَيْهَا الأُم
شن حطيتي لبوك .
مُنَى . قالي ديريلي طاسه لبن وتمر .
الأمْ عشيتيهم خوتك .
مُنَى إيه توا كيف ناضو يتناقزو
الأمْ باهي سيبي من أيدك وبري كملي قرايتك . توا نكمل عليك
منى .. لالا خلاص كملت أخر صونيه هادي . أهو شوية ونتم ..
الأم باهي .. سكري الضي . ما تنسيه
منى . حاضر .
مَا إِن هَمَّت الأمْ بِالخُرُوج مِنَ المَطْبَخ أَوْقَفَتها مُنَى بِكَلِمَاتِهَا
مُنَى . يام كلمتي بوي على الفلوس .
الأمْ إيه كلمته بكري . تلقيهم على الطاولة غدوة الصبح قبل ما تمشي المدرسة
أَكْمَلَت مُنَى تَنْظ\يف الصُّحون وَتَرْتِيب المَطْبَخ وَرَجَعَت إِلىَ غُرْفَتِهَا لِتُنْهِي دِرَاسَتَها
أَنْهَت وَاجِبَهَا المَدْرَسِي وَبَدَأت تَهُم بِجَمْع الكُتُب وَالكَرَّاسَات مِن سَرِيرَهَا .
إِذْ سَمِعَت صَوْتَ أَبِيهَا لِيَقُول
الأب . ياسر بنيتي خشي استريحي غدوة وراك مدرسة
مُنَى . باهي اهو نايضة .. خلاص كملت ..غير كان عندي شوية واجبات وكملتهم
الأب . ربي يعاونك .تغطي كويس هي تصبحي على خير
منى . تصبح على خير
وَضَعَت مُنَى كُتُبَهَا فِي حَقِيَبتَها . وَأَغْلَقت الأنْوَار وَاتجَهَت لِفَوْرِهَا إِلَى سَرِيرَهَا لِتُزِيح الغِطَاء وَتَنْزَاح تَحْتَه
مَا إِن أَغْلَقَنت عَيْنَيْها حَتَّى انسَابَت خُيُوط النَّوْم إِلَيْهَا وَغَاب وَعْيَهَا ..
لاَ اَعْلَم لَرُبَّمَا حَلمَت تِلْكَ الليْلَة بِبعْضِ الأَحْلاَم أَوْ بَعْض الكَوَابِيس
يتبع في الحلفة القادمة
